غيري فكرة تغيري سلوك... ما بلاش نتكلم في الماضي... :) ... الحلقة الاولي

طبعا انا لما بلاقي عدد المشاهدات للمواضيع كتير بتبسط بس الحقيقة انا مش هفضل انادي في الوادي لوحدي طبعا

يعني من الاخر لازم نتشارك الحوار ... يا حلوات

شغلي انهاردة وتعبي او فرحتي بناءا علي اللي اتعلمته من افكار زمان... وبكرة دي هيتغير او هيفضل زي ما هو كده بناءا علي تغييري لرؤيتي او لافكاري انهاردة

مثال للكلام دي

زمان كان اللي بيضايقني برد عليه واتخانق... المهم مسكتش عن اللي انا فاكرة حقي... واللي يضايقني علي دماغه علطول...هو هيقرفني ليه؟؟؟ ومعنديش استعداد اخسر اي معركة... اللي يجادلني اجادله ولازم يكون عندي حق وارويه هبله وغبائه في الحوار.... دي بناءا علي فكرة عندي وهي ان مستحيل اخسر وليه اخسر وازاي؟؟؟

لكن دلوقتي... بدأت اغير واقول اسمع فعلا...يعني لازم اسمع الشخص اللي قدامي... ومش دايما لازم اكون علي حق...الشيطان ساعات بيصورلنا اننا دايما علي حق...في حين انك لو هديت هتقدر تشوف الامور بمنظور تاني... كمان انك يكون عند شخص تثق فيه وتحكي معاه وتتكلم وتسأل النصيحة دي شئ مهم....

ودي المقصود... اننا نحاول نغير من نفسنا كويس بشكل يليق وكمان نتعلم اننا نبطل نحكم علي الناس لأننا بنحكم بمعيارنا احنا واسلوبنا احنا وهم متربوش بنفس اسلوبنا ولا عاشوا نفس تجاربنا

في مبدأ حلو

أسمه غير فكرة هتغير سلوك .... مع الاخذ في الاعتبار ان التغيير شئ مش سهل...وان العقل والانسان بيركن لمكان ضل بدل ما يحارب عشان يتغيير ويقف في الشمس...الاسهل بيدور عليه ...

يعني مثلا انا فكرتي ان ام ممتازة ولازم ابني يسمع كلامي عشان انا الكبيرة وهو الصغير اللي مش فاهم ... دي مش صح دايما

الفكرة هنا ...

انا الكبيرة اللي بتفهم في كل شئ

المشاعر: هو الغضب الدائم من تصرفات ابني لما بيعارضني

السلوك : عقاب ابني والرد عليه بطريقة مش لطيفة ابدا واني اسكته باسلوب انت هتفهم اكتر مني

..... أذن لازم نتعلم نغير فكرتنا... الدنيا اتقدمت ومش كل شئ احنا نعرفه...لازم نتعلم نسمع غيرنا...لازم نسمع عيالنا لأن ممكن يكون عندهم افكار تفيدنا

مثال تاني

صديقتي اختلفت معايا في موضوع

الفكرة هنا : انا عايزة صحبتي تسمعني ولازم ارد عليها الرد قد الرد اصلها مش فاهمة...وانا لازم افهمها

المشاعر: ازاي صحبتي مش فاهمة...احسن تعمل حاجة غلط... الزعل والغضب من اقل تحاور

السلوك : المقاطعة كتير في الكلام والاحتدام واللي بينتهي غالبا بالزعل

...الفكرة مش لازم كل شخص يحاورني اوضحلوا انه غلطان ... وان انا الصح.... لأ.. كده غلط ... لازم نتعلم ان ربنا اعطانا اتنين أذن عشان نسمع اكتر ما نتكلم... اتعملي متقطعيش حد غير لما يخلص وركزي تفهمي منه الفكرة من رفضه او موافقته...يمكن يفيدك...يمكن يغير وجهة نظرك... احنا بنكون مستعدين عشان نرفض لمجرد الرفض...بس لازم نتعلم نسمع عشان نفهم

وهنبدأ بتغيير الفكرة وتغيير سلوكياتنا حتي نستفيد

Shaymaa