أحب أحب... وأحب أتحب :) ..عالوستي

زمان كان لو بنوتة قالت عايزة احب واتحب

يقال انها مجنونة وعيب

محتاجيين نفهم ان في الحياة

أحب أحب: يعني انت عايزة شخص تعطيه الحب اللي عندك...تغمريه بالحنان اللي تملكيه ..وبالطريقة اللي نفسك فيها.... انت كأنسان محتاجة تعطي الحب دي لشخص... تهتمي به وتاخدي بالك عليه تحبي تتدلعيه... ( يعني هنا انت اللي بتعطي الحب ) ممكن يكون مين في حياتك

زوجك ... اولادك ... نفسك ... اهلك ... اخواتك ... اصحابك

مثال

حسيت انك نفسك تطبطبي علي حد من اولادك يبقي تروحي لاولادك ...

نفسك تتدلعي جوزك ... بتروحي تشتري له هدية بسيطة او بتعملي حاجة حلوة بتعبري له عن حبك

ماماتك بقالك فترة مش شفتيها ... عملت طبق بسبوسة وروحتي زورتيه ... رفعت سماعة التليفون علي بابا وحكيت

حلمت بصديقتك وقلقتي عليها ... او وحشتك فجأة رغم انكم كنتم مع بعض امبارح... تاني يوم كلمتيها وقتلها وحشتيني

أحب اتحب : يعني انت عايزة حد يحبك في اللحظة دي بالطريقة دي عشان تشبعي من الحب ... حد يهتم بك ويعيشك الحب دي بالشكل دي ... (يعني هنا انت اللي محتاجة الحب وغيرك بيعطيه ليك) . ممكن يكون مين في حياتك

زوجك ... اولادك ... نفسك ... اهلك ... اخواتك ... اصحابك

مثال

حسيت انك نفسك في حضن من اولادك ودلع

حسيت ان نفسك في هدية بسيطة من جوزك

اخوك بقاله فترة مش بيسأل... بابا انشغل لوقت عنك ...

نيجي بقي للنقطة الاهم

كلنا بنعرف أحب أحب

فاشليين في أحب اتحب ... بننتظر ان غيرنا يفهم بالاسلكي والاشارة ولغة الصم والبكم اللي احنا يمكن نقعد مليون سنة علي ما نقدر نتعلمها انهم هيفهموا اللي جوانا ... (اللي حواليك مش هينجموا او يفتحوا المندل..او يشوفوا الكف)

لازم نعرف اننا نعبر عن طلباتنا الداخلية باسلوب مناسب للطرف الاخر سواء كان اب ... ام ... زوج... اولاد ... اصحاب ... حتي انت نفسك المفترض تحبي نفسك وتساعديه (وانا هنا مش بتكلم عن الانانية) انا بتكلم ان الرسول أوصي ان لنفسك عليك حق

خلي اللي جواك يطلع بصدق بدون لوم ولا عتاب لحد... لأن اللوم والعتاب بيخلي الطرف التاني يحس انه مقصر وساعتها كل الشخص بيبدأ يهاجم ويدافع عن نفسه وساعاتها هتخسري لحظة حلوة كان نفسك فيها

يعني نفسك ولادك يحضنوكي في اللحظة دي .... افردي دراعاتك وقولي مين هايجي لحضن ماما

نفسك جوزك يجبلك هدية الماظ خليك حنينة برده الاسبوع دي هاتي مكنسة والشهر اللي بعده هاتي الالماظ

حبي شفت الخاتم دي ولاقيته تحفة وهياكل من ايدي حتة واحنا متأنجججججين ..... يقوم يطلقك علطول بهدي النفوس انا (بهزر طبعا)

هنفرد موضوع لكيفية الطلب من الزوج وممن نحب .... بس دي بشرط ان الواحد يلاقي تفاعل طبعا

اللي نفسك فيه اطلبيه بطريقة مناسبة

النصيحة التانية متعوضيش شئ بشئ تاني... لأن النهاية هتفضل موجوعة وهتخرجي من مرحلة انت عارفة انت عايزة ايه لمرحلة ان الالالم والعطش والجوع للعواطف مخليك مش شايفة قدامك ولا فاهمة نفسك انت في ايه

يعني لو انت ميتة من العطش واعطيتك كوب زبادي هيروح العطش ... لو جعانة واعطيتك عصير هتشبعي

التوقعات المرئية بتقول لأ أكيد

يعني لو انت نفسك في هدية من زوجك .... و اولادك جابوا هدية .... هل دي هيعوض اللي انت محتاجة .... الحقيقة انه هيخليك تهدي شوية وترجعي تاني تبحثي عن الشئ اللي انت محتاجة

لازم تعرفي ان كل شئ ربنا خلقه في الدنيا عشان يتحط في مكانه ومفيش شئ بيعوضه ...

كتر ما بتحاولي تسد عطشك بالزيادي هتموت من العطش وهتتعصبي وتتوتري وتفقدي كل الملذات اللي ربنا اعطاها ليك

Shaymaa